ලෝකයේ ගොඩක් දෙනා අතර තවත් ජනප්‍රියම ක්‍රීඩාවක් තමයි Formula One, එහෙමත් නැත්නම් F1 කියලා කියන්නේ. මේ F1 තරඟ අනිත් මෝටර් ධාවන තරඟ වලට වඩා වෙනස් වෙන්නේ ඒ සඳහා යොදාගන්නා වාහනවල වගේම මුළු තරඟය පුරාවටම භාවිතා වන දියුණු තාක්ෂණික ක්‍රම නිසා. මේ දියුණු තාක්ෂණික බලපෑම නිසාම, මේ තරඟ ඉතාමත් තියුණු ස්වභාවයක් ගන්නවා.

මේ F1 තරඟ වලදී මූලික අවධානය දිනාගන්න දේවල් දෙකක් තියෙනවා. ඒ තමයි තරඟකරු, එහෙමත් නැතිනම් ධාවකයා. ඒ වගේම මේ සඳහා භාවිතා වන වාහනය. F1 සඳහාම නිමවුණු සුප්‍රසිද්ධ වාහන නිශ්පාදන සන්නාම වලින් එළිදක්වන ලද මේ වාහනයටත් විශේෂ අවධානයක් හිමි වෙනවා.

තරඟය ජයග්‍රහණය කරන්න වැදගත්ම සාධකය වෙන්නේ මේකට සහභාගීවන තරඟකරුගේ ධාවනය විතරයි කියලා හිතුවාට, මේ ජයග්‍රහණය පිටුපස ඉතා විශාල කණ්ාඩයමක් ඉන්නවා. ඉහළ කළමණාකරණයේ පටන්, ඉංජිනේරුවන්, තාක්ෂණික නිළධාරීන්, සහායකයින් වගේ තවත් පිරිසකගේ දායකත්වය මත තමයි තරඟකරුවාගේ සාර්ථකත්වය තීරණය වෙන්නේ.

ඔබ කවදාක හරි මේ තරඟ නරඹලා තියෙනවා නම්, ඔබ දැකලා ඇති, තරඟය අතරවාරයේ වාහනයේ තාක්ෂණික අළුත්වැඩියා සඳහා එක්තරා ස්ථානයකට ධාවකයා රථය ගෙන එනවා. මේ අවස්ථාවේදී, තාක්ෂණික ශිල්පීන් පිරිසක් රථය වටා රොක් වෙනවා. වාහනයේ ටයර් මාරු කිරීම, අළුතින් ඉන්ධන පිරවීම වගේම බ්රේක් පරීක්ෂාවක් වැනි ක්‍රියාවන් මේ පිරිස සිදු කරනවා. මේකේ විශේෂත්වය තමයි, මේ සියල්ල සිදු කරන්න ඔවුන්ට ගත වෙන්නේ තත්පර ගණනාවක් පමණයි. හැකි ඉක්මනින් නැවතත් රථය ධාවනපථයට ගෙන යෑම සඳහා රියදුරුට සහය වීමට මේ පිරිස බැඳී සිටිනවා.

මේ ක්‍රියාවලිය අපි ඇත්තටම අපිට ආදේශ කරලා බැලුවොත් ඔබට යම් සමානකම් දකින්න පුළුවන් ද? අපේ බ්‍රැන්ඩික්ස් සමූහයේ සියළු දෙනාම එක අරමුණක් ඔස්සේ තමයි මේ සියළුම වැඩ කරන්නේ. අපේ අරමුණ තමයි, අපි පිබිදුණු විසඳුම් ලබා දෙන සන්නාම සඳහා උසස් තත්වයේ නිශ්පාදන ලබාදීම. මේ සඳහා අපි වෙනුවෙන් මේ තරඟයට සහභාගී වෙන ධාවකයා තමයි අපේ ආදරණීය මැහුම් ශිල්පිණියන්. අපි හැමෝම අපේ වගකීම් නිසි ආකාරයෙන් ඉටු කරලා උත්සාහ කරන්නේ, මෙන්න මේ මැහුම් ශිල්පිණියට අපි වෙනුවෙන් මේ තරඟය දිනන්න අවශ්‍යය කරන පහසුකම් සලසා දෙන්න කියන කාරණාව මූලික කරගෙන තමයි.

ලෝකයක් ඉදිරියේ තමන්ගේ ජයග්‍රහණය සටහන් කරන්න කැපවෙන F1 ධාවකයාට වගේම, අපේ පුංචි රටේ නිශ්පාදනයක් ලොකයක් ඉදිරියට අරන් යන්න කැපවෙන බ්‍රැන්ඩික්ස් පවුලේ අපේම සාමාජික සාමාජිකාවන් ගැන ආඩම්බරයක් ඔයාටත් දැනෙනවා නේද?