අම්මා කියන්නේ වචනයක් විතරක් නෙමෙයි. ඒක විස්තර කරන්න බැරි විශාල හැඟීමක්. ඔයාව මේ ලෝකෙට එන්න කලින් ඉඳලම ඔයාව කුසේ දරාගෙන, කවදාවත් නොදැකපු ඔයාට මහමෙරක් තරම් ආදරයක් අම්මා ලබා දුන්නා. ඉපදෙන්න කලින් ඉඳලම ඔයාව පරිස්සම් කළ, ඔයා වෙනුවෙන් පරිස්සම් වුණ අම්මා, ඔයා මේ ලෝකෙට ආවට පස්සෙත් ඔයා කොච්චර ලොකු වුණත් තාමත් ඔයාව දරාගෙන ඉන්නවා. ඒ ආදරයට සම කරන්න පුළුවන් ආදරයක් මේ ලෝකෙ නැති තරම්. අම්මාගේ ඒ අසීමිත ආදරයත් එක්ක තාත්තාගේ අසීමිත ආදරයත් එකතු වුණාම දරුවෙක්ගේ ලෝකය ගොඩක් ලස්සන වෙනවා.

අද ලෝක මව්වරුන්ගේ දිනය. සමහර විට මේක කියවන ඔයත් අම්මා කෙනෙක් නම්, එහෙම නැත්නම් ආදරණීය පුංචි අම්මා කෙනෙක් හෝ නැන්දා කෙනෙක් නම් ඔයාට දැනෙනවා ඇති මාතෘත්වය කියන්නේ මොන තරම් ආදරණීය, වගකීම් සහගත පදවියක් ද කියලා. ඔයා ඒ දරුවන් වෙනුවෙන් නිදි නොලබා කරන කැපකිරීම, දරුවෙකුට පුංචිම හරි අසනීපයක් හැදුණම ඔයාගේ හිතට දැනෙන හැඟීම මේ හැම දෙයක්ම විඳින කෙනෙක් නම් ඔයා දන්නවා අම්මා ඔයා වෙනුවෙනුත් මොන තරම් කැපවීමක් කරන්න ඇත් ද කියලා. අම්මා කෙනෙක් නොවුණත්, බ්‍රැන්ඩික්ස් ආයතනයේ සාඩම්බර දිනන දියණියක් වුණ ඔයා ගෙදර සාමාජිකයන් වෙනුවෙන්, ඔයා වෙනුවෙන් මහන්සිවෙලා රැකියාවක් කරන වගකීම් සහගත දියණියක් විදියට මේ වෙනකොට ජීවිතේ බර මොන වගේ ද කියලා දන්නවනේ. ඒ වගේ දහස් ගුණයක බරක් උහුලගෙන තමයි අම්මා ඔයාව ඔය තැනට ගෙනැත් තියෙන්නෙ.