මිනිසෙකුට සාර්ථක වීමට නම් කැපවීම් බොහොමයක් සිදු කරන්න වෙනවා. ඔහුගේ කැපවීම හා දැක්මත් ඔහු අප සමඟ බෙදාහදා ගත්තා. “මං මොනවා හරි දෙයක් කරන්න ගත්තොත් මං ඒකට උපරිම දායකත්වයක් ලබා දෙනවා. හැම වෙලාවෙ ඒක උපරිමයක් කරලා ඒකෙ රිසල්ට් එකක් දකින එක තමා මගේ බලාපොරොත්තුව.රැකියාවෙ ප්‍රමෝෂන් බලාගෙන වැඩ කරන කෙනෙක් නෙවෙයි. හැබැයි මං කරන වැඩේ කරන වෙලාවට හරියටම කරනවා. ඒක මගෙ පැෂන් එක.”

“මං පළවෙනියට පටන් ගත්ත දවසෙ ඉඳලා අද වෙනකම් රැකියාවට යනකොට මට කම්මැළි ගතියක් දැනිලා නෑ. කරන වැඩේට ආදරේ කිරීම මගේ ගමනට ලොකු උදව්වක් උනා. මං ලොරි වලට බඩු පටවලත් තියෙනවා, ෂිප්මන්ට් දාලත් තියෙනවා. ඒක ඇඟෙන් එන, ආසාවෙන් එන දෙයක්.” තමා කරන දේ කැමැත්තෙන්, අලස නොවී සිදු කිරීම කෙතරම් වැදගත් ද යන්නත් ඔහුගේ කතාවෙන් අපට පැහැදිලි උනා.

“මොන දේ කරත් ඒ දේට ආදරයෙන්, උවමනාවෙන් කරන්න. මං ගොඩක් විශ්වාස කරන දෙයක් තමයි තමන් තමන්ම වෙන්න ඕනි කියන එක. මේ සංකීර්ණ සමාජෙ ඇතුළෙ තමන් කවුද කියන එක තේරුම් ගත්තොත් හිත සතුටින්, සැහැල්ලුවෙන් ජීවත් වෙන්න පුළුවන්.” ලෙස අවසන් වශයෙන් බ්‍රැන්ඩික්ස් ප්‍රජාවට පමණක් නොව සෑම දෙනෙක්ටම වැදගත් වන පණිවුඩයකුත් ඔහුගේ කතාවෙන් ඔහු ලබා දුන්නා.