සම්බන්ධතා කියන්නෙ ජීවිතේ බලාපොරොත්තු එක්ක ඉස්සරහට යනකොට අත්‍යාවශ්‍යම කාරණාවක්. සුවපත් මනසක් පවත්වා ගෙන යෑමටත් ඒ සම්බන්ධතා බෙහෙවින්ම බලපෑම් කරනවා. එහි දී යහපත් සම්බන්ධතාව කියන දේ අතිශයින්ම වැදගත්. අදාළ සම්බන්ධතාව පවතින පාර්ශවයන්, ඔවුනොවුන්ට ගරු කරනවා නම්, ඔවුනොවුන්ට අවංක වෙනවා නම්, ඔවුනොවුන් අතර යහපත් සන්නිවේදනයක් පවත්ව ගන්නවා නම්, සම්බන්ධතාව ඉදිරියට පවත්වාගෙන යාමට උනන්දුවක් උවමනාවක් දක්වනවා නම් එවැන්නක් යහපත් සම්බන්ධතාවක් කියලා හඳුන්වන්න පුළුවන්. අප පවත්වා ගන්නා සම්බන්ධතා වලදී අපට ලැබෙන්නේ පීඩනයක්, මානසික අපහසුතාවක් නම් එවැනි සම්බන්ධතාවක් අයහපත් සම්බන්ධතාවක් කියලා හඳුන්වන්න පුළුවන්.

යුවළක් අතර පවතින සම්බන්ධතාවක් විවාහයක් දක්වා ගෙන යාමේ දී ගෘහස්ථ හිංසනය ගැනත් දැන සිටිය යුතුයි. කෙනෙක් කායිකව, මානසිකව, ආර්ථිකව, වාචිකව, ලිංගිකව සමීප සම්බන්ධයක් තියෙන පුද්ගලයෙකු නිසා හිංසනයට පත් වෙනවා නම් එවැන්නක් ගෘහස්ථ හිංසනය ලෙස සලකනු ලැබෙනවා.

මෙවැනි තත්ත්වයන්ට මුහුණ දී සිටින පුද්ගලයින්ට අප උපකාර කළ යුතුයි; ඔවුන්ට ඇහුම්කන් දිය යුතුයි. ළඟම තියෙන පොලීසියෙන්, රෝහලෙන් වගේම ඔබ සේවය කරන බ්‍රැන්ඩික්ස් ආයතනයේ මනෝ උපදේශන අංශයෙනුත්, මේ හැර, කාන්තා පිහිට නමැති ආයතනයෙනුත්, නීති ආධාර කොමිසමෙනුත්, ගෘහස්ථ හිංසනයට පත් වී සිටින කාන්තා, පුරුෂ දෙපාර්ශ්වයටම සේවය ලබාගත හැකියි.

ඒත් අපේ සමීපතමයිනුත් අපේම අතින් හිංසනයට ලක් වෙන්න පුළුවන්. ඒ නිසා අපේ සිතුවිලි, ක්‍රියාවන් හා වචන වලිනුත් අපි අනෙක් අයව පීඩාවට පත් නොකළ යුතුයි. තවත් කෙනෙකුගේ හිතට සහනයක් දෙන දෙයක් කතා කරන්නට හුරු විය යුතුයි.